aql ko chhoD ke dil ishq ke maidan mein aa

'aql ko chhoḌ ke dil 'ishq ke maidān meñ aa

dekh le nūr-e-ḳhudā 'ālam-e-irfān meñ aa

garche us nuur kā hai yuuñ to sabhī jā-e-zuhūr

par khulā ḳhuub tarah sūrat-e-insān meñ aa

dekho gulḳhan meñ vahī haigā sharār-e-ātish

jo huā rañg-e-gul-o-guñcha gulistān meñ aa

shakl-e-lailā meñ numāyāñ jo huā thā jalva

vahī majnūñ bhī huā koh-o-bayābān meñ aa

vahī suufī hai ki masjid meñ paḌhe haigā namāz

jaam piitā hai vahī majlis-e-rindān meñ aa

sham.a-rū kaahe ko 'asġhar' se ḳhafā rahtā hai

aa mirī jaan mire dil ke shabistān meñ aa

'aql ko chhoD ke dil 'ishq ke maidan mein aa

dekh le nur-e-KHuda 'alam-e-irfan mein aa

garche us nur ka hai yun to sabhi ja-e-zuhur

par khula KHub tarah surat-e-insan mein aa

dekho gulKHan mein wahi haiga sharar-e-atish

jo hua rang-e-gul-o-guncha gulistan mein aa

shakl-e-laila mein numayan jo hua tha jalwa

wahi majnun bhi hua koh-o-bayaban mein aa

wahi sufi hai ki masjid mein paDhe haiga namaz

jam pita hai wahi majlis-e-rindan mein aa

shama-ru kahe ko 'asghar' se KHafa rahta hai

aa meri jaan mere dil ke shabistan mein aa