عقل کو چھوڑ کے دل عشق کے میدان میں آ

عقل کو چھوڑ کے دل عشق کے میدان میں آ

دیکھ لے نور خدا عالم عرفان میں آ

گرچہ اس نور کا ہے یوں تو سبھی جائے ظہور

پر کھلا خوب طرح صورت انسان میں آ

دیکھو گلخن میں وہی ہے گا شرار آتش

جو ہوا رنگ گل و غنچہ گلستان میں آ

شکل لیلیٰ میں نمایاں جو ہوا تھا جلوہ

وہی مجنوں بھی ہوا کوہ و بیابان میں آ

وہی صوفی ہے کہ مسجد میں پڑھے ہے گا نماز

جام پیتا ہے وہی مجلس رندان میں آ

شمع رو کاہے کو اصغرؔ سے خفا رہتا ہے

آ مری جان مرے دل کے شبستان میں آ