KHwab mein un ko ja ke dekh liya

ḳhvāb meñ un ko jā ke dekh liyā

un ko un se chhupā ke dekh liyā

na chhupe merī aañkh se na chhupe

tum ne ḳhud ko chhupā ke dekh liyā

mere dil se kabhī nikal na sake

tum ne dāman chhuḌā ke dekh liyā

tum se milne kī aarzū na ga.ī

ḳhaak meñ bhī milā ke dekh liyā

na rakkhā tum ne ek din bhī qadam

ham ne āñkheñ bichhā ke dekh liyā

na lagā jī kis jagah na lagā

har jagah jī lagā ke dekh liyā

ai ġhazab ġham yahāñ bhī aa pahuñchā

mahal ūñche banā ke dekh liyā

merī dīvāngī kā kyā kahnā

ruḳh se parda haTā ke dekh liyā

hāsil-e-'umr kā pata na chalā

'umr saarī gañvā ke dekh liyā

ḳhaak hāsil huā na ai 'amjad'

har taraf ḳhaak uḌā ke dekh liyā

KHwab mein un ko ja ke dekh liya

un ko un se chhupa ke dekh liya

na chhupe meri aankh se na chhupe

tum ne KHud ko chhupa ke dekh liya

mere dil se kabhi nikal na sake

tum ne daman chhuDa ke dekh liya

tum se milne ki aarzu na gai

KHak mein bhi mila ke dekh liya

na rakkha tum ne ek din bhi qadam

hum ne aankhen bichha ke dekh liya

na laga ji kis jagah na laga

har jagah ji laga ke dekh liya

ai ghazab gham yahan bhi aa pahuncha

mahal unche bana ke dekh liya

meri diwangi ka kya kahna

ruKH se parda haTa ke dekh liya

hasil-e-'umr ka pata na chala

'umr sari ganwa ke dekh liya

KHak hasil hua na ai 'amjad'

har taraf KHak uDa ke dekh liya