hoga karam jo is dil-e-bimar par tera

hogā karam jo is dil-e-bīmār par tirā

likh dūñgā naam maiñ dar-o-dīvār par tirā

mujh be-qusūr ko tabhī denā koī sazā

ho saḳht faisla jo gunahgār par tirā

ye phuul isliye maiñ bichhātā huuñ raah meñ

bhūle se bhī na pair paḌe ḳhaar par tirā

sāhil mujhe nasīb bhalā hogā kis liye

kashtī pe haq tirā hai to mañjhdār par mirā

har ik varaq pe terī hī tārīf kyuuñ na ho

qabza ḳhabar pe hai tirā aḳhbār par tirā

tuune mujhe jo apnā kahā hai mere sanam

jaadū sā ho gayā dil-e-‘izhār’ par tirā

hoga karam jo is dil-e-bimar par tera

likh dunga nam main dar-o-diwar par tera

mujh be-qusur ko tabhi dena koi saza

ho saKHt faisla jo gunahgar par tera

ye phul isliye main bichhata hun rah mein

bhule se bhi na pair paDe KHar par tera

sahil mujhe nasib bhala hoga kis liye

kashti pe haq tera hai to manjhdar par mera

har ek waraq pe teri hi tarif kyun na ho

qabza KHabar pe hai tera aKHbar par tera

tune mujhe jo apna kaha hai mere sanam

jadu sa ho gaya dil-e-‘izhaar’ par tera