suna jab bagh mein shor-e-anadil

sunā jab baaġh meñ shor-e-'anādil

dhaḌak uThā mirā nā-āshnā dil

nahīñ suntā mirī ab to mirā dil

usī kūche meñ dekho phir chalā dil

kahā karte ho jab tum huuñ maiñ ’ādil

to vāpas kyuuñ nahīñ karte mirā dil

nihāyat kashmakash meñ maiñ paḌā huuñ

ḳhafā vo dil se haiñ mujh se ḳhafā dil

'ajab kūcha hai qātil kā hamāre

paḌe haiñ jā-ba-jā sar jā-ba-jā dil

hasīnoñ kī adā par mar rahā huuñ

ḳhudā ne de diyā hai chulbulā dil

usī dar par paḌe rahte the tum 'arsh'

usī se māñgo apnā chulbulā dil

suna jab bagh mein shor-e-'anadil

dhaDak uTha mera na-ashna dil

nahin sunta meri ab to mera dil

usi kuche mein dekho phir chala dil

kaha karte ho jab tum hun main ’adil

to wapas kyun nahin karte mera dil

nihayat kashmakash mein main paDa hun

KHafa wo dil se hain mujh se KHafa dil

'ajab kucha hai qatil ka hamare

paDe hain ja-ba-ja sar ja-ba-ja dil

hasinon ki ada par mar raha hun

KHuda ne de diya hai chulbula dil

usi dar par paDe rahte the tum 'arsh'

usi se mango apna chulbula dil