masiha kahan ho tumhein kya hua hai

masīhā kahāñ ho tumheñ kyā huā hai

jigar kā bhī nāsūr achchhā huā hai

huī qais kī aañkh lailā se raushan

añdhere se paidā ujālā huā hai

abhī kal to muusā ke tum rū-ba-rū the

hue chand din ye jo pardā huā hai

manāo to rūTheñ na bolo to boleñ

hamārā ye sab āzmāyā huā hai

hai gor-e-ġharībāñ pe ye fakHr un ko

ki ye shahr merā basāyā huā hai

khīñche phirte haiñ aap hī aap mujh se

na jhagḌā huā hai na qissa huā hai

yahāñ dam nikaltā hai vo kah rahe haiñ

abhī kyā huā hai abhī kyā huā hai

usī ne yahāñ muñh kī khaa.ī hai ik din

jo favvāra kī tarah ūñchā huā hai

basān-e-qalam safha-e-dahr se uTh

kahāñ misl-e-nuqta tū baiThā huā hai

ye tahrīk kā 'arsh terī sabab thā

gayā maiñ jo is fan kā charchā huā hai

masiha kahan ho tumhein kya hua hai

jigar ka bhi nasur achchha hua hai

hui qais ki aankh laila se raushan

andhere se paida ujala hua hai

abhi kal to musa ke tum ru-ba-ru the

hue chand din ye jo parda hua hai

manao to ruThen na bolo to bolen

hamara ye sab aazmaya hua hai

hai gor-e-ghariban pe ye fakHr un ko

ki ye shahr mera basaya hua hai

khinche phirte hain aap hi aap mujh se

na jhagDa hua hai na qissa hua hai

yahan dam nikalta hai wo kah rahe hain

abhi kya hua hai abhi kya hua hai

usi ne yahan munh ki khai hai ek din

jo fawwara ki tarah uncha hua hai

basan-e-qalam safha-e-dahr se uTh

kahan misl-e-nuqta tu baiTha hua hai

ye tahrik ka 'arsh teri sabab tha

gaya main jo is fan ka charcha hua hai