arz kar deta hun us se haal-e-dil

arz kar detā huuñ us se hāl-e-dil

vo mirā dam-sāz kuchh hai to sahī

maiñ tire husn-e-tabassum ke nisār

lutf kā andāz kuchh hai to sahī

dard kī daulat mayassar hai mujhe

dil amīn-e-rāz kuchh hai to sahī

mil rahā hai ik-na-ik ġham kā payām

ziist kā āġhāz kuchh hai to sahī

ishq ke naġhme haiñ har shām-o-sahar

dil meñ soz-o-sāz kuchh hai to sahī

zindagī hai ma.asiyat kā ā.īna

phir bhī us par naaz kuchh hai to sahī

faiz-e-'hāfiz' se hamāre jaam meñ

bāda-e-shīrāz kuchh hai to sahī

vo bhī 'sādiq' gosh-bar-āvāz haiñ

ab merī āvāz kuchh hai to sahī

arz kar deta hun us se haal-e-dil

wo mera dam-saz kuchh hai to sahi

main tere husn-e-tabassum ke nisar

lutf ka andaz kuchh hai to sahi

dard ki daulat mayassar hai mujhe

dil amin-e-raaz kuchh hai to sahi

mil raha hai ik-na-ik gham ka payam

zist ka aaghaz kuchh hai to sahi

ishq ke naghme hain har sham-o-sahar

dil mein soz-o-saz kuchh hai to sahi

zindagi hai masiyat ka aaina

phir bhi us par naz kuchh hai to sahi

faiz-e-'hafiz' se hamare jam mein

baada-e-shiraaz kuchh hai to sahi

wo bhi 'sadiq' gosh-bar-awaz hain

ab meri aawaz kuchh hai to sahi