wahi but ban ke baiTha hai kisi ka raaz-dan ho kar

vahī but ban ke baiThā hai kisī kā rāz-dāñ ho kar

vahī girje ke ghanTa meñ hai poshīda zabāñ ho kar

vo man meñ sañkh ke baiThā hai mandir meñ nihāñ ho kar

musalmānoñ kī masjid se nikaltā hai azaañ ho kar

usī ne suulī dilvā.ī anal-haq vahī bolā thā

vahī mansūr ke muñh meñ thā poshīda zabāñ ho kar

vahī baiThā huā thā kaaf meñ aur nuun meñ chhup kar

vahī kun kah ke ḳhud ban aayā thā kaun-o-makāñ ho kar

bulāyā us ne kis ko thā shab-e-me.arāj ḳhud hī thā

vahī ik pal meñ aayā thā zamīñ se āsmāñ ho kar

'alī 'asġhar' ke lāsha par kahā hasrat ne ro-ro kar

ye aa.e be-zabāñ the aur ga.e bhī be-zabāñ ho kar

wahi but ban ke baiTha hai kisi ka raaz-dan ho kar

wahi girje ke ghanTa mein hai poshida zaban ho kar

wo man mein sankh ke baiTha hai mandir mein nihan ho kar

musalmanon ki masjid se nikalta hai azan ho kar

usi ne suli dilwai anal-haq wahi bola tha

wahi mansur ke munh mein tha poshida zaban ho kar

wahi baiTha hua tha kaf mein aur nun mein chhup kar

wahi kun kah ke KHud ban aaya tha kaun-o-makan ho kar

bulaya us ne kis ko tha shab-e-mearaj KHud hi tha

wahi ek pal mein aaya tha zamin se aasman ho kar

'ali 'asghar' ke lasha par kaha hasrat ne ro-ro kar

ye aae be-zaban the aur gae bhi be-zaban ho kar