na paya kuchh pata us ka KHuda jaane kahan hai wo

na paayā kuchh pata us kā ḳhudā jaane kahāñ hai vo

zamāne bhar meñ DhūñDh aayā ḳhudā jaane kahāñ hai vo

muazzin se jo pūchhā haath rakh kar us ne kānoñ par

kahā mujh ko ḳhabar hai kyā ḳhudā jaane kahāñ hai vo

use mandir meñ DhūñDh aayā use masjid meñ dekh aayā

nahīñ miltā nishāñ us kā ḳhudā jaane kahāñ hai vo

use maiñ ban ke 'āshiq saare mā'shūqoñ meñ DhūñDh aayā

nazar aayā na kuchh jalva ḳhudā jaane kahāñ hai vo

zamīn-o-āsmāñ kaun-o-makāñ dair-o-haram dekhā

nahīñ miltā pata us kā ḳhudā jaane kahāñ hai vo

papīhā pī kahāñ bolā kahā koyal ne tū hī tū

samajh meñ kuchh nahīñ aatā ḳhudā jaane kahāñ hai tū

kahāñ se pī ke aa.e ho bahut bahke ho tum 'asġhar'

kahāñ banda kahāñ maulā ḳhudā jaane kahāñ hai tū

na paya kuchh pata us ka KHuda jaane kahan hai wo

zamane bhar mein DhunDh aaya KHuda jaane kahan hai wo

muazzin se jo puchha hath rakh kar us ne kanon par

kaha mujh ko KHabar hai kya KHuda jaane kahan hai wo

use mandir mein DhunDh aaya use masjid mein dekh aaya

nahin milta nishan us ka KHuda jaane kahan hai wo

use main ban ke 'ashiq sare ma'shuqon mein DhunDh aaya

nazar aaya na kuchh jalwa KHuda jaane kahan hai wo

zamin-o-asman kaun-o-makan dair-o-haram dekha

nahin milta pata us ka KHuda jaane kahan hai wo

papiha pi kahan bola kaha koyal ne tu hi tu

samajh mein kuchh nahin aata KHuda jaane kahan hai tu

kahan se pi ke aae ho bahut bahke ho tum 'asghar'

kahan banda kahan maula KHuda jaane kahan hai tu