batlaun tumko kya hai aabid ke aansuon mein

batlā.ūñ tum ko kyā hai 'ābid ke āñsuoñ meñ

islām ro rahā hai 'ābid ke āñsuoñ meñ

havvā huuñ aamna huuñ zahrā huuñ yā ḳhadīja

dil un kā ro rahā hai 'ābid ke āñsuoñ meñ

ashkoñ meñ kitnī tāqat hotī hai kuchh pata hai

ik taḳht bah gayā hai 'ābid ke āñsuoñ meñ

mā ba.ad karbalā kī ’uryāniyāñ na pūchho

har shaam be-ridā hai 'ābid ke āñsuoñ meñ

vo aañkh be-hayā hai mar jaaye jis kā paanī

islām kī hayā hai 'ābid ke āñsuoñ meñ

sab ġham ke hī nahīñ haiñ kuchh haiñ ḳhushī ke aañsū

islām kī baqā hai 'ābid ke āñsuoñ meñ

ġharqāb hogā us meñ har ik yazīdī 'mājid'

tūfān-e-ġham chhupā hai 'ābid ke āñsuoñ meñ

batlaun tum ko kya hai 'abid ke aansuon mein

islam ro raha hai 'abid ke aansuon mein

hawwa hun aamna hun zahra hun ya KHadija

dil un ka ro raha hai 'abid ke aansuon mein

ashkon mein kitni taqat hoti hai kuchh pata hai

ek taKHt bah gaya hai 'abid ke aansuon mein

ma baad karbala ki ’uryaniyan na puchho

har sham be-rida hai 'abid ke aansuon mein

wo aankh be-haya hai mar jaye jis ka pani

islam ki haya hai 'abid ke aansuon mein

sab gham ke hi nahin hain kuchh hain KHushi ke aansu

islam ki baqa hai 'abid ke aansuon mein

gharqab hoga us mein har ek yazidi 'majid'

tufan-e-gham chhupa hai 'abid ke aansuon mein