gali mein us tark-e-mah-jabin ke ajib ye inqilab dekha

galī meñ us tark-e-mah-jabīñ ke 'ajīb ye inqilāb dekhā

namāz hindū ko paḌhte vā'iz ko ham ne piite sharāb dekhā

ġhanī hai vo mast-e-nāz merā hai us kī sarkār laao baalī

kabhī karam hai kisī pe be-had kabhī kisī par 'itāb dekhā

akele ham haiñ añdhere ghar meñ na farsh hai aur na koī yāvar

jo aañkh jhapkī bhī hijr kī shab to ye pareshān ḳhvāb dekhā

milā ye 'ishq butāñ kā samra ki Thokareñ khā.īñ chain khoyā

abhī qayāmat kā Dar alag hai pe jiite jī ye 'azāb dekhā

akelā baiThā thā merā yūsuf ki chhup ke ġhairoñ se ham bhī pahuñche

nasīb jaage to aaj ham ne yaar ko be-naqāb dekhā

nigāh vāris ne saiñkaḌoñ ko banāyā qatra se pal meñ dariyā

nazar jo aate the pahle zarre unhīñ ko phir āftāb dekhā

liyā hai jis din se nām-e-ulfat kahīñ na dam bhar ko chain paayā

ki ham ne 'aughat' dil-e-hazīñ ko hamesha pur-iztirāb dekhā

gali mein us tark-e-mah-jabin ke 'ajib ye inqilab dekha

namaz hindu ko paDhte wa'iz ko hum ne pite sharab dekha

ghani hai wo mast-e-naz mera hai us ki sarkar lao baali

kabhi karam hai kisi pe be-had kabhi kisi par 'itab dekha

akele hum hain andhere ghar mein na farsh hai aur na koi yawar

jo aankh jhapki bhi hijr ki shab to ye pareshan KHwab dekha

mila ye 'ishq butan ka samra ki Thokaren khain chain khoya

abhi qayamat ka Dar alag hai pe jite ji ye 'azab dekha

akela baiTha tha mera yusuf ki chhup ke ghairon se hum bhi pahunche

nasib jage to aaj hum ne yar ko be-naqab dekha

nigah waris ne sainkaDon ko banaya qatra se pal mein dariya

nazar jo aate the pahle zarre unhin ko phir aaftab dekha

liya hai jis din se nam-e-ulfat kahin na dam bhar ko chain paya

ki hum ne 'aughat' dil-e-hazin ko hamesha pur-iztirab dekha