tujhi ko jaan-e-jaan dair-o-haram mein jalwa-gar dekha

tujhī ko jān-e-jāñ dair-o-haram meñ jalva-gar dekhā

tū hī har jā nazar aayā jahāñ dekhā jidhar dekhā

koī zohra-jabīñ dekhā koī rashk-e-qamar dekhā

sarāpā ḳhush-adā lekin tujhī ko sīm-bar dekhā

ye terī aañkh hai yā bāda-e-vahdat kā sāġhar hai

huā be-hosh-o-be-kHud jis ko tū ne ik nazar dekhā

lahad tak bhī na chhoḌā merā pīchhā dard-e-dil tū ne

na aisā saath dene vaalā maiñ ne 'umr-bhar dekhā

sunā hai shaiḳh jī aa.e haiñ kā'ba se chalo pūchheñ

nazar aayā ḳhudā bhī yā ḳhudā kā ḳhālī ghar dekhā

ye āñkheñ phuuT jaa.eñ gar kisī ko ik nazar dekheñ

tumheñ dekhā kareñgī aur tum hī ko 'umr-bhar dekhā

ziyārat kī kisī ne dair kī kā'ba gayā koī

ham apne ghar se jab 'aughaT' chale vāris kā dar dekhā

tujhi ko jaan-e-jaan dair-o-haram mein jalwa-gar dekha

tu hi har ja nazar aaya jahan dekha jidhar dekha

koi zohra-jabin dekha koi rashk-e-qamar dekha

sarapa KHush-ada lekin tujhi ko sim-bar dekha

ye teri aankh hai ya baada-e-wahdat ka saghar hai

hua be-hosh-o-be-kHud jis ko tu ne ek nazar dekha

lahad tak bhi na chhoDa mera pichha dard-e-dil tu ne

na aisa sath dene wala main ne 'umr-bhar dekha

suna hai shaiKH ji aae hain ka'ba se chalo puchhen

nazar aaya KHuda bhi ya KHuda ka KHali ghar dekha

ye aankhen phuT jaen gar kisi ko ek nazar dekhen

tumhein dekha karengi aur tum hi ko 'umr-bhar dekha

ziyarat ki kisi ne dair ki ka'ba gaya koi

hum apne ghar se jab 'aughaT' chale waris ka dar dekha