تجھی کو جان جاں دیر و حرم میں جلوہ گر دیکھا

تجھی کو جان جاں دیر و حرم میں جلوہ گر دیکھا

تو ہی ہر جا نظر آیا جہاں دیکھا جدھر دیکھا

کوئی زہرہ جبیں دیکھا کوئی رشک قمر دیکھا

سراپا خوش ادا لیکن تجھی کو سیم بر دیکھا

یہ تیری آنکھ ہے یا بادۂ وحدت کا ساغر ہے

ہوا بے ہوش و بیخود جس کو تو نے اک نظر دیکھا

لحد تک بھی نہ چھوڑا میرا پیچھا درد دل تو نے

نہ ایسا ساتھ دینے والا میں نے عمر بھر دیکھا

سنا ہے شیخ جی آئے ہیں کعبہ سے چلو پوچھیں

نظر آیا خدا بھی یا خدا کا خالی گھر دیکھا

یہ آنکھیں پھوٹ جائیں گر کسی کو اک نظر دیکھیں

تمہیں دیکھا کریں گی اور تم ہی کو عمر بھر دیکھا

زیارت کی کسی نے دیر کی کعبہ گیا کوئی

ہم اپنے گھر سے جب اوگھٹؔ چلے وارث کا در دیکھا