chale hain gesu sanwar kar wo kahin qayamat bapa karenge

chale haiñ gesū sañvār kar vo kahīñ qayāmat bapā kareñge

kisī hamāre se be-ḳhatā ko asiir zulf-e-dotā kareñge

butoñ se vāqif huuñ sañg-dil haiñ kabhī na ḳhauf-e-ḳhudā kareñge

ġharaz ki bande haiñ be-muravvat ye jab kareñge daġhā kareñge

marīz-e-ulfat huuñ chāra-sāzo uThāo haath ab ḳhudā pe chhoḌo

laboñ pe dam aayā dard-e-dil kī tabīb ab kyā davā kareñge

ye maanā ḳhush-rū haiñ be-vafā bhī shi.ār jaur-o-sitam hai un kā

magar jo dil hī na deñge un ko to phir hamārā ye kyā kareñge

vahāñ hameñ kis kā ḳhauf hogā ḳhayāl aayā to dekh lenā

suneñge yuuñ sab butoñ kā shikva ḳhudā se roz-e-jazā kareñge

badal ke bhes apnā us kī mahfil meñ shab ko is vāste chaleñge

ki chupke ġhairoñ ke pīchhe baiThe ham un kī bāteñ sunā kareñge

butoñ ko ab yuuñ jalā.eñge ham kareñge un kā lihāz kab tak

unheñ dikhā kar unhī ke aage hamesha yād-e-ḳhudā kareñge

kiyā hai ye 'ahd un hasīnoñ ko deñge sau baar dīn-o-īmāñ

ḳhudā kī qasam kisī ko bhī na ab dil diyā kareñge

sunā hai islām chhoḌ deñge butoñ kī ḳhātir janāb-e-'aughaT’

ye baat achchhī nahīñ hai agar aisā kareñge burā kareñge

chale hain gesu sanwar kar wo kahin qayamat bapa karenge

kisi hamare se be-KHata ko asir zulf-e-dota karenge

buton se waqif hun sang-dil hain kabhi na KHauf-e-KHuda karenge

gharaz ki bande hain be-murawwat ye jab karenge dagha karenge

mariz-e-ulfat hun chaara-sazo uThao hath ab KHuda pe chhoDo

labon pe dam aaya dard-e-dil ki tabib ab kya dawa karenge

ye mana KHush-ru hain be-wafa bhi shiar jaur-o-sitam hai un ka

magar jo dil hi na denge un ko to phir hamara ye kya karenge

wahan hamein kis ka KHauf hoga KHayal aaya to dekh lena

sunenge yun sab buton ka shikwa KHuda se roz-e-jaza karenge

badal ke bhes apna us ki mahfil mein shab ko is waste chalenge

ki chupke ghairon ke pichhe baiThe hum un ki baaten suna karenge

buton ko ab yun jalaenge hum karenge un ka lihaz kab tak

unhen dikha kar unhi ke aage hamesha yaad-e-KHuda karenge

kiya hai ye 'ahd un hasinon ko denge sau bar din-o-iman

KHuda ki qasam kisi ko bhi na ab dil diya karenge

suna hai islam chhoD denge buton ki KHatir janab-e-'aughaT’

ye baat achchhi nahin hai agar aisa karenge bura karenge