jis ko dekha kushta-e-andaz mashuqana hai

jis ko dekhā kushta-e-andāz mā'shūqāna hai

jo terī mahfil meñ hai ai sham' parvāna hai

har gadā meñ us galī ke shaukat-e-shāhāna hai

rashk-e-dārā hai jo darbān dar-e-jānāna hai

zikr-e-'ishq-o-'āshqī sun ke vo bolā bad-gumāñ

sab ye bāteñ haiñ banāvaT kī faqat afsāna hai

ham raheñ sahrā meñ aur dard-o-alam dil meñ raheñ

ham musāfir haiñ hamārā dil musāfir-kHāna hai

kufr aur islām se vā'iz nahīñ mujh ko ġharaz

dīn-o-īmāñ 'ishq hai millat mirī rindāna hai

kyā tasavvur un butoñ kā dil meñ rahtā hai mere

yā ilāhī dil hai merā yā koī but-ḳhāna hai

shaiḳh ko kā'ba mubārak barahman ko but-kada

riñd huuñ zāhid mujhe kaafī dar-e-mai-ḳhāna hai

sun ke fariyād-o-fuġhāñ merī vo bolā sañg-dil

kaun rotā hai ye kis kī āh-e-be-tābāna hai

uTh ke ham ko thaam le mahfil meñ vo maḳhmūr naaz

is tamannā par ye apnī laġhzish-e-mastāna hai

jis ko dekhā shāh-e-vāris ne huā be-hosh-o-mast

aañkh hai yā bāda-e-vahdat kā ye paimāna hai

sīna-kūbī dekh kar 'aughaT' kī bolā vo hasīñ

ye koī saudā.ī hai ḳhabtī hai yā dīvāna hai

jis ko dekha kushta-e-andaz ma'shuqana hai

jo teri mahfil mein hai ai sham' parwana hai

har gada mein us gali ke shaukat-e-shahana hai

rashk-e-dara hai jo darban dar-e-jaanana hai

zikr-e-'ishq-o-'ashqi sun ke wo bola bad-guman

sab ye baaten hain banawaT ki faqat afsana hai

hum rahen sahra mein aur dard-o-alam dil mein rahen

hum musafir hain hamara dil musafir-kHana hai

kufr aur islam se wa'iz nahin mujh ko gharaz

din-o-iman 'ishq hai millat meri rindana hai

kya tasawwur un buton ka dil mein rahta hai mere

ya ilahi dil hai mera ya koi but-KHana hai

shaiKH ko ka'ba mubarak barahman ko but-kada

rind hun zahid mujhe kafi dar-e-mai-KHana hai

sun ke fariyaad-o-fughan meri wo bola sang-dil

kaun rota hai ye kis ki aah-e-be-tabana hai

uTh ke hum ko tham le mahfil mein wo maKHmur naz

is tamanna par ye apni laghzish-e-mastana hai

jis ko dekha shah-e-waris ne hua be-hosh-o-mast

aankh hai ya baada-e-wahdat ka ye paimana hai

sina-kubi dekh kar 'aughaT' ki bola wo hasin

ye koi saudai hai KHabti hai ya diwana hai