bāġh-e-jahāñ ke gul haiñ yā ḳhaar haiñ to hum haiñ

bāġh-e-jahāñ ke gul haiñ yā ḳhaar haiñ to ham haiñ

gar yaar haiñ to ham haiñ aġhyār haiñ to ham haiñ

dariyā-e-ma.arifat ke dekhā to ham haiñ sāhil

gar vaar haiñ to ham haiñ aur paar haiñ to ham haiñ

vābasta hai hamīñ se gar jabr hai o gar qadr

majbūr haiñ to ham haiñ muḳhtār haiñ to ham haiñ

terā hī husn jag meñ har-chand maujzan hai

tis par bhī tishna-kām-e-dīdār haiñ to ham haiñ

alfāz-e-ḳhalq ham bin sab mohmilāt se the

ma.anī kī tarah rabt-e-guftār haiñ to ham haiñ

auroñ se to girānī yak-laḳht uTh ga.ī hai

ai 'dard' apne dil ke gar baar haiñ to ham haiñ

bāġh-e-jahāñ ke gul haiñ yā ḳhaar haiñ to hum haiñ

gar yar haiñ to hum haiñ aġhyār haiñ to hum haiñ

dariyā-e-marifat ke dekhā to hum haiñ sāhil

gar war haiñ to hum haiñ aur par haiñ to hum haiñ

wābasta hai hamīñ se gar jabr hai o gar qadr

majbūr haiñ to hum haiñ muḳhtār haiñ to hum haiñ

terā hī husn jag meñ har-chand maujzan hai

tis par bhī tishna-kām-e-dīdār haiñ to hum haiñ

alfāz-e-ḳhalq hum bin sab mohmilāt se the

manī kī tarah rabt-e-guftār haiñ to hum haiñ

auroñ se to girānī yak-laḳht uTh gaī hai

ai 'dard' apne dil ke gar bar haiñ to hum haiñ