bā-hosh wahī haiñ dīwāne ulfat meñ jo aisā karte haiñ

bā-hosh vahī haiñ dīvāne ulfat meñ jo aisā karte haiñ

har vaqt unhī ke jalvoñ se īmān kā saudā karte haiñ

ham ahl-e-junūñ meñ bas yahī me.arāj-e-ibādat hai apnī

miltā hai jab un kā naqsh-e-qadam ham shukr kā sajda karte haiñ

milte haiñ nazar hosh uḌte haiñ mastī bhī barasne lagtī hai

ma.alūm nahīñ vo kaun sī mai āñkhoñ se pilāyā karte haiñ

paate haiñ vahī maqsūd-e-nazar miltī hai unheñ manzil un kī

jo un kī tamannā meñ har dam ḳhud apnī tamannā karte haiñ

hai shauq yahī mastānoñ ko hai sharm yahī dīvānoñ ko

siine se lagā kar yaad us kī us shoḳh kī puujā karte haiñ

māyūs na ho nādān na ban dil soz-e-alam se jalne de

jo chāhne vaale haiñ un ke vo aag se khelā karte haiñ

ham kis ke hue dil kis ne liyā vo kaun hai kyā hai kyā kahiye

ye raaz abhī tak khul na sakā ham kis kī tamannā karte haiñ

maiḳhāna-e-hastī meñ ham ne ye rañg nayā dekhā saaqī

jin bāda-kashoñ ko hosh nahīñ vo hosh kā da.avā karte haiñ

ye kaisī jafā.eñ hotī haiñ ye kaisī adā hai un kī 'fanā'

ham husn kā parda rakhte haiñ vo ishq kā da.avā karte haiñ

bā-hosh wahī haiñ dīwāne ulfat meñ jo aisā karte haiñ

har waqt unhī ke jalwoñ se īmān kā saudā karte haiñ

hum ahl-e-junūñ meñ bas yahī mearāj-e-ibādat hai apnī

miltā hai jab un kā naqsh-e-qadam hum shukr kā sajda karte haiñ

milte haiñ nazar hosh uḌte haiñ mastī bhī barasne lagtī hai

malūm nahīñ wo kaun sī mai āñkhoñ se pilāyā karte haiñ

pate haiñ wahī maqsūd-e-nazar miltī hai unheñ manzil un kī

jo un kī tamannā meñ har dam ḳhud apnī tamannā karte haiñ

hai shauq yahī mastānoñ ko hai sharm yahī dīwānoñ ko

sine se lagā kar yaad us kī us shoḳh kī pujā karte haiñ

māyūs na ho nādān na ban dil soz-e-alam se jalne de

jo chāhne wale haiñ un ke wo aag se khelā karte haiñ

hum kis ke hue dil kis ne liyā wo kaun hai kyā hai kyā kahiye

ye raaz abhī tak khul na sakā hum kis kī tamannā karte haiñ

maiḳhāna-e-hastī meñ hum ne ye rañg nayā dekhā saqī

jin bāda-kashoñ ko hosh nahīñ wo hosh kā dawā karte haiñ

ye kaisī jafāeñ hotī haiñ ye kaisī adā hai un kī 'fanā'

hum husn kā parda rakhte haiñ wo ishq kā dawā karte haiñ