masha-allah hai kya tera moattar gesu

māshā-allāh hai kyā terā mo.attar gesū

nāfa-e-mushk-e-ḳhutan se bhī hai behtar gesū

kyā karūñ vasf ki kyā hai terā dilbar gesū

sunbulistān-e-iram yā ki muambar gesū

lab se āñkhoñ se zanaḳhdāñ se ruḳhsāroñ se

sab se ḳhūbī meñ baḌhā hai terā number gesū

sūraj grahan kā gumāñ hue munajjim ko abhī

ruḳh-e-kHortāb se mil jaa.eñ jo dam bhar gesū

aks se tāj-e-murassā ke ye hotā hai gumāñ

dasht-e-zulmāt meñ hai ma.adan-e-gauhar gesū

aaj kyā hai ki pareshānī hai chehra se ayaañ

kyuuñ sarāsar ye nazar aate haiñ abtar gesū

kyuuñ udāsī hai ye chehra pe kaho haal hai kyā

ruḳh ke faq-rañg haiñ kyuuñ aur hai abtar gesū

dastaras kaise huī arz-o-samā kī duurī

aap ke paañv to haiñ aaj falak par gesū

ye ḳhatā apnī hai kHud-karda-e-rāyāñ che ilaaj

ḳhud pashemāñ huuñ chaḌhā kar tujhe sar par gesū

baal khole na lab-e-bām tum aao hargiz

kahīñ ban jaa.eñ na aḌ jaane ko shahpar gesū

kyā ulaT-pher hai kyā shān-e-ḳhudā hai 'tāhir'

shāna gesū pe kabhī shāne ke uupar gesū

masha-allah hai kya tera moattar gesu

nafa-e-mushk-e-KHutan se bhi hai behtar gesu

kya karun wasf ki kya hai tera dilbar gesu

sunbulistan-e-iram ya ki muambar gesu

lab se aankhon se zanaKHdan se ruKHsaron se

sab se KHubi mein baDha hai tera number gesu

suraj grahan ka guman hue munajjim ko abhi

ruKH-e-kHortab se mil jaen jo dam bhar gesu

aks se taj-e-murassa ke ye hota hai guman

dasht-e-zulmat mein hai madan-e-gauhar gesu

aaj kya hai ki pareshani hai chehra se ayan

kyun sarasar ye nazar aate hain abtar gesu

kyun udasi hai ye chehra pe kaho haal hai kya

ruKH ke faq-rang hain kyun aur hai abtar gesu

dastaras kaise hui arz-o-sama ki duri

aap ke panw to hain aaj falak par gesu

ye KHata apni hai kHud-karda-e-rayan che ilaj

KHud pasheman hun chaDha kar tujhe sar par gesu

baal khole na lab-e-baam tum aao hargiz

kahin ban jaen na aD jaane ko shahpar gesu

kya ulaT-pher hai kya shan-e-KHuda hai 'tahir'

shana gesu pe kabhi shane ke upar gesu