jab se bargashta jahan mein hui izzat meri

jab se bargashta jahāñ meñ huī izzat merī

pher lete haiñ vo muñh dekh ke sūrat merī

dil-o-jāñ ne bhī na kī vaqt pe shirkat merī

hairat-afzā hai zamāna meñ musībat merī

husn-e-jānāñ pe nazar paḌte hī jaate rahe hosh

ik ishāre meñ yahāñ luT ga.ī daulat merī

jis kī ummīd pe baiThā huā duniyā meñ rahā

haaye us ne kabhī pūchhī bhī na hālat merī

sar qalam kar de mirā shauq se qātil lekin

hashr meñ rañg dikhā degī shahādat merī

yā ilāhī mire dushman ko bhī ye dukh na dikhā

jis musībat se kaTī hai shab-e-furqat merī

ab meñ ummīd karūñ ba.ad-e-fanā kyā un se

zindagī meñ jo na niklī kabhī hasrat merī

un ke sab zulm-o-sitam sahtā huuñ dil par lekin

un se phirtī hī nahii. phir bhī tabī.at merī

maiñ judā sab se huuñ duniyā meñ nahii. mujh sā koī

kis se miltī hai batā de koī sūrat merī

kis jagah fikr nahii. un kī nahīñ un kī talāsh

un kā dīdār ho aisī kahāñ qismat merī

zulm sahtā rahā uf tak na zabāñ par aa.ī

'fitratī' aap ne dekhī ye sharārat merī

jab se bargashta jahan mein hui izzat meri

pher lete hain wo munh dekh ke surat meri

dil-o-jaan ne bhi na ki waqt pe shirkat meri

hairat-afza hai zamana mein musibat meri

husn-e-jaanan pe nazar paDte hi jate rahe hosh

ek ishaare mein yahan luT gai daulat meri

jis ki ummid pe baiTha hua duniya mein raha

haye us ne kabhi puchhi bhi na haalat meri

sar qalam kar de mera shauq se qatil lekin

hashr mein rang dikha degi shahadat meri

ya ilahi mere dushman ko bhi ye dukh na dikha

jis musibat se kaTi hai shab-e-furqat meri

ab mein ummid karun baad-e-fana kya un se

zindagi mein jo na nikli kabhi hasrat meri

un ke sab zulm-o-sitam sahta hun dil par lekin

un se phirti hi nahi phir bhi tabiat meri

main juda sab se hun duniya mein nahi mujh sa koi

kis se milti hai bata de koi surat meri

kis jagah fikr nahi un ki nahin un ki talash

un ka didar ho aisi kahan qismat meri

zulm sahta raha uf tak na zaban par aai

'fitrati' aap ne dekhi ye shararat meri