wo hum ko KHwab mein surat dikha ke baiThe hain

vo ham ko ḳhvāb meñ sūrat dikhā ke baiThe haiñ

nasīb aaj ham apnā jagā ke baiThe haiñ

na pūchho shauq shahādat kā ham se kuchh ahvāl

shahīd hone ko maqtal meñ aake baiThe haiñ

savāl shauq-e-shahādat kiyā nahīñ jaatā

ḳhamosh sāmne qātil ke jaake baiThe haiñ

hamāre paas hai kyā nazar kyā kareñ un ko

jo naqd-e-dil thā use bhī luTā ke baiThe haiñ

hujūm ahl-e-mohabbat se ho ga.e aajiz

yahī sabab hai ki parde meñ jā ke baiThe haiñ

firāq meñ kisī gulgūñ qabā ke ghabrā kar

chaman meñ dil kī tasallī ko aake baiThe haiñ

kahāñ hai ab hameñ tāqat ki uTh ke jaa.eñ kahīñ

nigah ke tiir to ham dil pe khā ke baiThe haiñ

ḳhudā ke vāste ai ‘fitratī’ baġhaur tu dekh

ki kaun chhup ke nigāhoñ meñ aa ke baiThe haiñ

wo hum ko KHwab mein surat dikha ke baiThe hain

nasib aaj hum apna jaga ke baiThe hain

na puchho shauq shahadat ka hum se kuchh ahwal

shahid hone ko maqtal mein aake baiThe hain

sawal shauq-e-shahadat kiya nahin jata

KHamosh samne qatil ke jake baiThe hain

hamare pas hai kya nazar kya karen un ko

jo naqd-e-dil tha use bhi luTa ke baiThe hain

hujum ahl-e-mohabbat se ho gae aajiz

yahi sabab hai ki parde mein ja ke baiThe hain

firaq mein kisi gulgun qaba ke ghabra kar

chaman mein dil ki tasalli ko aake baiThe hain

kahan hai ab hamein taqat ki uTh ke jaen kahin

nigah ke tir to hum dil pe kha ke baiThe hain

KHuda ke waste ai ‘fitrati’ baghaur tu dekh

ki kaun chhup ke nigahon mein aa ke baiThe hain