aasman par kale baadal chha gae

āsmāñ par kaale bādal chhā ga.e

ghar ke andar aa.ine dhuñdlā ga.e

kyā ġhazab hai ek bhī koyal nahīñ

sab baġhīche aam ke mañjrā ga.e

ghaTte baḌhte fāsloñ ke darmiyāñ

daf.atan do rāste bal khā ga.e

Dūbtā hai aa ke sūraj un ke paas

vo darīche mere dil ko bhā ga.e

shahar kyā duniyā badal kar dekh lo

phir kahoge ham to ab uktā ga.e

sāmne thā be-ruḳhī kā āsmāñ

is liye vāpas zamīñ par aa ga.e

yaad aayā kuchh girā thā TuuT kar

be-ḳhudī meñ ḳhud se kal Takrā ga.e

hurmat-e-lauh-o-qalam jaatī rahī

kis tarah ke log adab meñ aa ga.e

ham haiñ mujrim aap mulzim bhī nahīñ

aap kis anjām se ghabrā ga.e

ho ga.ī hai sho.ala-zan har shāḳh-e-gul

baḌh rahe the haath jo tharrā ga.e

dhañs ga.e jo ruk ga.e the raah meñ

dekhte the muḌ ke jo pathrā ga.e

ghar kī tanhā.ī jab āñgan ho ga.ī

ye sitāre kyā qayāmat Dhā ga.e

the muḳhātab jism lahje be-shumār

jāñ-ba-lab armāñ 'ḳhalish' ġhazlā ga.e

aasman par kale baadal chha gae

ghar ke andar aaine dhundla gae

kya ghazab hai ek bhi koyal nahin

sab baghiche aam ke manjra gae

ghaTte baDhte faslon ke darmiyan

dafatan do raste bal kha gae

Dubta hai aa ke suraj un ke pas

wo dariche mere dil ko bha gae

shahar kya duniya badal kar dekh lo

phir kahoge hum to ab ukta gae

samne tha be-ruKHi ka aasman

is liye wapas zamin par aa gae

yaad aaya kuchh gira tha TuT kar

be-KHudi mein KHud se kal Takra gae

hurmat-e-lauh-o-qalam jati rahi

kis tarah ke log adab mein aa gae

hum hain mujrim aap mulzim bhi nahin

aap kis anjam se ghabra gae

ho gai hai shoala-zan har shaKH-e-gul

baDh rahe the hath jo tharra gae

dhans gae jo ruk gae the rah mein

dekhte the muD ke jo pathra gae

ghar ki tanhai jab aangan ho gai

ye sitare kya qayamat Dha gae

the muKHatab jism lahje be-shumar

jaan-ba-lab arman 'KHalish' ghazla gae