mere nala haye sahar kabhi jo labon tak aake machal gae

mere naala haaye sahar kabhī jo laboñ tak aake machal ga.e

tire baam tak na pahuñch sake to ġhazal ke ruup meñ Dhal ga.e

vo fazā-e-mai-kada sāqiyā na patā ḳhirad kā na hosh kā

ye tirī nigāh kā faiz thā ki gire to gir ke sambhal ga.e

rah-e-shauq kī vo masāfateñ vo havā-e-tund kī shorisheñ

tirī ḳhāk-e-pā ke tufail meñ jo nikal ga.e vo nikal ga.e

ye ajiib sahar-e-tarāziyāñ haiñ 'kalīm' yād-e-habīb kī

kabhī aa ga.ī to taḌap uThe kabhī aa ga.ī to bahal ga.e

mere nala haye sahar kabhi jo labon tak aake machal gae

tere baam tak na pahunch sake to ghazal ke rup mein Dhal gae

wo faza-e-mai-kada saqiya na pata KHirad ka na hosh ka

ye teri nigah ka faiz tha ki gire to gir ke sambhal gae

rah-e-shauq ki wo masafaten wo hawa-e-tund ki shorishen

teri KHak-e-pa ke tufail mein jo nikal gae wo nikal gae

ye ajib sahar-e-taraaziyan hain 'kalim' yaad-e-habib ki

kabhi aa gai to taDap uThe kabhi aa gai to bahal gae