ru-e-taban yar ka KHurshid se kuchh kam nahin

rū-e-tābāñ yaar kā ḳhurshīd se kuchh kam nahīñ

kab ḳhajil us kī ziyā se nayyar-e-a’azam nahīñ

sab hasīnān-e-jahāñ haiñ sar-ba-sar zar ke mutī.a

paas apne dāġh-e-sīna haiñ magar dirham nahīñ

haiñ ḳhajil qaus-o-hilāl-o-kHanjar-o-teġh-e-sitam

qātil-e-a.alam hai terī abrū-e-pur-kHam nahīñ

'ishq meñ us zulf ke tū shakl-e-shāna ban gayā

saaf hotī tujh se ai dil kākul-e-barham nahīñ

asal kī jānib ko har shai kartī hai zāhid rujūa

gar na chhoḌeñ bāġh-e-jannat ham banī-ādam nahīñ

naza.a ke vaqt aayā samjhāne se logoñ ke vo shoḳh

hañs ke bolā makar hai is kā ye kuchh be-dam nahīñ

haath duniyā se uThā le pahle ai 'bahrām' tū

paañv phailāne kā tujhko chār-sū phir ġham nahīñ

ru-e-taban yar ka KHurshid se kuchh kam nahin

kab KHajil us ki ziya se nayyar-e-a’azam nahin

sab hasinan-e-jahan hain sar-ba-sar zar ke mutia

pas apne dagh-e-sina hain magar dirham nahin

hain KHajil qaus-o-hilal-o-kHanjar-o-tegh-e-sitam

qatil-e-alam hai teri abru-e-pur-kHam nahin

'ishq mein us zulf ke tu shakl-e-shana ban gaya

saf hoti tujh se ai dil kakul-e-barham nahin

asal ki jaanib ko har shai karti hai zahid rujua

gar na chhoDen bagh-e-jannat hum bani-adam nahin

naza ke waqt aaya samjhane se logon ke wo shoKH

hans ke bola makar hai is ka ye kuchh be-dam nahin

hath duniya se uTha le pahle ai 'bahram' tu

panw phailane ka tujhko chaar-su phir gham nahin