bahut barsi ghaTa chhane se pahle

bahut barsī ghaTā chhāne se pahle

vo aa.e haiñ ḳhayāl aane se pahle

taġhāful-kesh maiñ ne tum ko samjhā

magar dīvāna ban jaane se pahle

maqām-e-dil muqaddam hai nazar par

dil aayā hai nazar aane se pahle

zarā suljhā.eñ dil kī uljhanoñ ko

vo apnī zulf suljhāne se pahle

kab aatī hai qayāmat maiñ batā.ūñ

tire jaane ke ba.ad aane se pahle

bahāreñ muskurātī haiñ ḳhizāñ meñ

khile haiñ phuul murjhāne se pahle

hañsī kī jhalkiyāñ haiñ āñsuoñ meñ

vo ḳhud aate the yaad aane se pahle

naqāb aayā na aa.e un ke ruḳh par

hamāre hosh meñ aane se pahle

'zahīn' us kī haqīqat jis ne samjhī

na samjhī mere afsāne se pahle

bahut barsi ghaTa chhane se pahle

wo aae hain KHayal aane se pahle

taghaful-kesh main ne tum ko samjha

magar diwana ban jaane se pahle

maqam-e-dil muqaddam hai nazar par

dil aaya hai nazar aane se pahle

zara suljhaen dil ki uljhanon ko

wo apni zulf suljhane se pahle

kab aati hai qayamat main bataun

tere jaane ke baad aane se pahle

bahaaren muskuraati hain KHizan mein

khile hain phul murjhane se pahle

hansi ki jhalkiyan hain aansuon mein

wo KHud aate the yaad aane se pahle

naqab aaya na aae un ke ruKH par

hamare hosh mein aane se pahle

'zahin' us ki haqiqat jis ne samjhi

na samjhi mere afsane se pahle