yun to jo chahe yahan sahab-e-mahfil ho jae

yuuñ to jo chāhe yahāñ sāhab-e-mahfil ho jaa.e

bazm us shaḳhs kī hai tū jise hāsil ho jaa.e

nāḳhudā ai mirī kashtī ke chalāne vaale

lutf to jab hai ki har mauj hī sāhil ho jaa.e

isliye chal ke har ik gaam pe ruk jaatā huuñ

tā na be-kaif ġham-e-dūri-e-manzil ho jaa.e

tujh ko apnī hī qasam ye to batā de mujh ko

kyā ye mumkin hai kabhī tū mujhe hāsil ho jaa.e

haa.e us vaqt dil-e-zār kā a.alam kyā ho

gar mohabbat hī mohabbat ke muqābil ho jaa.e

phīkā phīkā hai mirī bazm-e-mohabbat kā charāġh

tum jo aa jaao to kuchh raunaq-e-mahfil ho jaa.e

terī nazreñ jo zarā mujh pe karam farmā.eñ

terī nazroñ kī qasam phir yahī dil dil ho jaa.e

hosh us ke haiñ ye jaam uskā hai tū hai uskā

mai-kade meñ tire jo shaḳhs bhī ġhāfil ho jaa.e

fitna-gar shauq se 'bahzād' ko kar de pāmāl

is se taskīn-e-dilī gar tujhe hāsil ho jaa.e

yun to jo chahe yahan sahab-e-mahfil ho jae

bazm us shaKHs ki hai tu jise hasil ho jae

naKHuda ai meri kashti ke chalane wale

lutf to jab hai ki har mauj hi sahil ho jae

isliye chal ke har ek gam pe ruk jata hun

ta na be-kaif gham-e-duri-e-manzil ho jae

tujh ko apni hi qasam ye to bata de mujh ko

kya ye mumkin hai kabhi tu mujhe hasil ho jae

hae us waqt dil-e-zar ka aalam kya ho

gar mohabbat hi mohabbat ke muqabil ho jae

phika phika hai meri bazm-e-mohabbat ka charagh

tum jo aa jao to kuchh raunaq-e-mahfil ho jae

teri nazren jo zara mujh pe karam farmaen

teri nazron ki qasam phir yahi dil dil ho jae

hosh us ke hain ye jam uska hai tu hai uska

mai-kade mein tere jo shaKHs bhi ghafil ho jae

fitna-gar shauq se 'bahzad' ko kar de pamal

is se taskin-e-dili gar tujhe hasil ho jae