ai dida-e-dil jalwa-e-jaanana kahan hai

ai dīda-e-dil jalva-e-jānāna kahāñ hai

apne to sabhī baiThe haiñ begāna kahāñ hai

aa.ī haiñ har ik samt se ghir-ghir ke ghaTā.eñ

saaqī mire saaqī mirā paimāna kahāñ hai

lillāh batā do hai mujhe kufr kī hājat

ka.aba to har ik jā hai sanam-ḳhāna kahāñ hai

kuchh ishq kā andāz hai kuchh husn kā andāz

afsos ki ik rañg meñ afsāna kahāñ hai

ik din vo thā Thukrāte the dīvāne ke armāñ

ab pūchhte phirte haiñ ki dīvāna kahāñ hai

ai rahrav-e-kā'ba mujhe itnā to batā de

maiñ but kī tamannā meñ huuñ but-ḳhāna kahāñ hai

kyuuñ ḳhaar hī chuntā hai are phuul bhī chun le

vahshī ye gulistāñ hai ye vīrāna kahāñ hai

in kaalī ghaTāoñ ne bahut mast kiyā hai

koī ye batā de mujhe mai-ḳhāna kahāñ hai

'bahzād' mire dam se thī sar-garmī-e-mahfil

ab sham.a bhī jaltī hai to parvāna kahāñ hai

ai dida-e-dil jalwa-e-jaanana kahan hai

apne to sabhi baiThe hain begana kahan hai

aai hain har ek samt se ghir-ghir ke ghaTaen

saqi mere saqi mera paimana kahan hai

lillah bata do hai mujhe kufr ki hajat

kaba to har ek ja hai sanam-KHana kahan hai

kuchh ishq ka andaz hai kuchh husn ka andaz

afsos ki ek rang mein afsana kahan hai

ek din wo tha Thukraate the diwane ke arman

ab puchhte phirte hain ki diwana kahan hai

ai rahraw-e-ka'ba mujhe itna to bata de

main but ki tamanna mein hun but-KHana kahan hai

kyun KHar hi chunta hai are phul bhi chun le

wahshi ye gulistan hai ye virana kahan hai

in kali ghaTaon ne bahut mast kiya hai

koi ye bata de mujhe mai-KHana kahan hai

'bahzad' mere dam se thi sar-garmi-e-mahfil

ab shama bhi jalti hai to parwana kahan hai