mere gham ki talKHiyan paighambar samjha nahin

mere ġham kī talḳhiyāñ paiġhāmbar samjhā nahīñ

un se jo kahnā thā kah aayā magar samjhā nahīñ

ik fusūñ sā chhā gayā kaun-o-makāñ meñ har taraf

mere sahr-e-'ishq ko jādū-nazar samjhā nahīñ

aa rahī thī mere qadmoñ kī sadā-e-dardnāk

kaun aatā hai charāġh-e-rah-guzar samjhā nahīñ

kah diyā kal raaz mai-ḳhāna kā saaqī ne magar

be-ḳhabar samjhe to samjhe bā-ḳhabar samjhā nahīñ

zulmatoñ se shab kī maiñ ne khel kar shab kaaT dī

har tajallī ko kabhī maiñ ne sahar samjhā nahīñ

maiñ to samjhā thā yuñhī āñkhoñ meñ aañsū aa ga.e

maiñ ne us ko apnī aahoñ kā asar samjhā nahīñ

ab to ye batlā rahā hai un kā andāz-e-hijāb

un kā jalva mujh ko be-tāb-e-nazar samjhā nahīñ

pā sakā 'ālam na merī ḳhush-navā.ī kā mazā

dīda-var ke paas maiñ thā dīda-var samjhā nahīñ

kis liye ākHir bhaTaktī apnī chashm-e-ishtiyāq

har jagah vo haiñ yahī zauq-e-nazar samjhā nahīñ

us ke pā-e-nāz ko hai mere sajdoñ kī talāsh

hosh hī kab the mujhe us kī nazar samjhā nahīñ

koī hī āvāz de de mere chashm-e-shauq ko

jalva kī kyā aarzū hai jalva-gar samjhā nahīñ

zulf-o-ruḳh se māvarā 'bahzād' hai merā ḳhayāl

merā 'ālam sāhab-e-shām-o-sahar samjhā nahīñ

mere gham ki talKHiyan paighambar samjha nahin

un se jo kahna tha kah aaya magar samjha nahin

ek fusun sa chha gaya kaun-o-makan mein har taraf

mere sahr-e-'ishq ko jadu-nazar samjha nahin

aa rahi thi mere qadmon ki sada-e-dardnak

kaun aata hai charagh-e-rah-guzar samjha nahin

kah diya kal raaz mai-KHana ka saqi ne magar

be-KHabar samjhe to samjhe ba-KHabar samjha nahin

zulmaton se shab ki main ne khel kar shab kaT di

har tajalli ko kabhi main ne sahar samjha nahin

main to samjha tha yunhi aankhon mein aansu aa gae

main ne us ko apni aahon ka asar samjha nahin

ab to ye batla raha hai un ka andaz-e-hijab

un ka jalwa mujh ko be-tab-e-nazar samjha nahin

pa saka 'alam na meri KHush-nawai ka maza

dida-war ke pas main tha dida-war samjha nahin

kis liye aakHir bhaTakti apni chashm-e-ishtiyaq

har jagah wo hain yahi zauq-e-nazar samjha nahin

us ke pa-e-naz ko hai mere sajdon ki talash

hosh hi kab the mujhe us ki nazar samjha nahin

koi hi aawaz de de mere chashm-e-shauq ko

jalwa ki kya aarzu hai jalwa-gar samjha nahin

zulf-o-ruKH se mawara 'bahzad' hai mera KHayal

mera 'alam sahab-e-sham-o-sahar samjha nahin