wo nazar gham ka sahaara na bane to kya ho

vo nazar ġham kā sahārā na bane to kyā ho

mauj uTh kar jo kinārā na bane to kyā ho

ashk hī gir ke baḌhātā rahā rañgīnī-e-shab

ashk hī sub.h kā taarā na bane to kyā ho

tum hamāre na hue ḳhair ye achchhā hī huā

aur agar koī tumhārā na bane to kyā ho

muddatoñ baa'd nazar aa.ī nazar kī jumbish

yahī jumbish jo ishārā na bane to kyā ho

gar fuġhāñ karne hī se rāz-e-dilī khultā hai

aur koī dard kā maarā na bane to kyā ho

ḳhair ḳhushiyoñ ne to muñh moḌ liyā hai ham se

aur agar ġham bhī hamārā na bane to kyā ho

kis tarah manzil-e-maqsūd ko paa.e rah-rau

yahī Thokar jo sahārā na bane to kyā ho

rūh-e-mai-e-ḳhāna agar hai to faqat jumbish-e-chashm

aur saaqī se ishārā na bane to kyā ho

ek aañsū kī haqīqat to nahīñ kuchh lekin

ye sitārā jo sitārā na bane to kyā ho

ham se pūchho ki basar hotī hai apnī kyuuñ kar

dard agar dard gavārā na bane to kyā ho

tum kahāñ jāoge le kar dil-e-pur-shauq apnā

koī 'bahzād' tumhārā na bane to kyā ho

wo nazar gham ka sahaara na bane to kya ho

mauj uTh kar jo kinara na bane to kya ho

ashk hi gir ke baDhata raha rangini-e-shab

ashk hi subh ka tara na bane to kya ho

tum hamare na hue KHair ye achchha hi hua

aur agar koi tumhaara na bane to kya ho

muddaton ba'd nazar aai nazar ki jumbish

yahi jumbish jo ishaara na bane to kya ho

gar fughan karne hi se raaz-e-dili khulta hai

aur koi dard ka mara na bane to kya ho

KHair KHushiyon ne to munh moD liya hai hum se

aur agar gham bhi hamara na bane to kya ho

kis tarah manzil-e-maqsud ko pae rah-rau

yahi Thokar jo sahaara na bane to kya ho

ruh-e-mai-e-KHana agar hai to faqat jumbish-e-chashm

aur saqi se ishaara na bane to kya ho

ek aansu ki haqiqat to nahin kuchh lekin

ye sitara jo sitara na bane to kya ho

hum se puchho ki basar hoti hai apni kyun kar

dard agar dard gawara na bane to kya ho

tum kahan jaoge le kar dil-e-pur-shauq apna

koi 'bahzad' tumhaara na bane to kya ho