hai wahi shab hain shab hain wahi tare wahi hangam hai

hai vahī shab haiñ shab haiñ vahī taare vahī hañgām hai

mere bujh jaane se kyuuñ tanhā charāġh-e-shām hai

zindagī ḳhush-kām hai yā zindagī nākām hai

ek hī 'ālam haiñ donoñ ek hī anjām hai

paas mere kyā hai ik dil ik jigar ik chashm-e-tar

ek dīvāna hai ik vahshī hai ik nākām hai

meñ duā-e-sub.h kyuuñ māñgūñ shab-e-ālām-o-hijr

sub.h kā 'ālam haqīqat meñ fareb-e-shām hai

ho rahe haiñ zarre zarre se 'ayāñ vo chaar sū

allāh allāh aaj phir izn-e-tamāshā 'aam hai

ab hamīñ ham rah ga.e haiñ is jahān-e-shauq meñ

ab na vo 'ālam na vo nazreñ na vo paiġhām hai

jhuk ga.ī hai un ke qadmoñ par jabīn-e-ārzū

kufr kahte haiñ jise shāyad usī kā naam hai

dūrī-e-manzil ko aksar ḳhud baḌhā letā huuñ maiñ

varna manzil par pahuñch jaanā bhī koī kaam hai

mere saaqī ne pilā.ī mujh ko is andāz se

mai-kade vaale yahī samjhe ki ḳhālī jaam hai

sunñe vaale sun rahe haiñ kahne vaalā kyuuñ kahe

zindagī afsāma-e-shām-o-sahar kā naam hai

shukr ke 'ālim meñ bhī aksar nikal jaatī hai aah

mujh pe ai 'bahzād' shikve kā 'abas ilzām hai

hai wahi shab hain shab hain wahi tare wahi hangam hai

mere bujh jaane se kyun tanha charagh-e-sham hai

zindagi KHush-kaam hai ya zindagi nakaam hai

ek hi 'alam hain donon ek hi anjam hai

pas mere kya hai ek dil ek jigar ek chashm-e-tar

ek diwana hai ek wahshi hai ek nakaam hai

mein dua-e-subh kyun mangun shab-e-alam-o-hijr

subh ka 'alam haqiqat mein fareb-e-sham hai

ho rahe hain zarre zarre se 'ayan wo chaar su

allah allah aaj phir izn-e-tamasha 'am hai

ab hamin hum rah gae hain is jahan-e-shauq mein

ab na wo 'alam na wo nazren na wo paigham hai

jhuk gai hai un ke qadmon par jabin-e-arzu

kufr kahte hain jise shayad usi ka nam hai

duri-e-manzil ko aksar KHud baDha leta hun main

warna manzil par pahunch jaana bhi koi kaam hai

mere saqi ne pilai mujh ko is andaz se

mai-kade wale yahi samjhe ki KHali jam hai

sunne wale sun rahe hain kahne wala kyun kahe

zindagi afsama-e-sham-o-sahar ka nam hai

shukr ke 'alim mein bhi aksar nikal jati hai aah

mujh pe ai 'bahzad' shikwe ka 'abas ilzam hai