gham mein bhi muskura raha hun main

ġham meñ bhī muskurā rahā huuñ maiñ

apnā 'ālam dikhā rahā huuñ maiñ

hichkiyo jab koī nahīñ merā

phir kise yaad aa rahā huuñ maiñ

us se mujh ko nahīñ vafā kī ummīd

jis ko apnā banā rahā huuñ maiñ

rakh rahā huuñ binā nasheman kī

bijliyoñ ko bulā rahā huuñ maiñ

ashk-e-ġham saath kyuuñ nahīñ dete

der se muskurā rahā huuñ maiñ

allāh allāh merī mastī-e-shauq

be-piye Dagmagā rahā huuñ maiñ

ashk bahte haiñ kuchh nahīñ kahtā

yuuñ fasāna sunā rahā huuñ maiñ

ho jalā.īñ thiiñ shām-e-furqat meñ

vahī sham.eñ bujhā rahā huuñ maiñ

yaad aatā hī jaatā hai 'bahzād'

vahī jis ko bhulā rahā huuñ maiñ

gham mein bhi muskura raha hun main

apna 'alam dikha raha hun main

hichkiyo jab koi nahin mera

phir kise yaad aa raha hun main

us se mujh ko nahin wafa ki ummid

jis ko apna bana raha hun main

rakh raha hun bina nasheman ki

bijliyon ko bula raha hun main

ashk-e-gham sath kyun nahin dete

der se muskura raha hun main

allah allah meri masti-e-shauq

be-piye Dagmaga raha hun main

ashk bahte hain kuchh nahin kahta

yun fasana suna raha hun main

ho jalain thin sham-e-furqat mein

wahi shamen bujha raha hun main

yaad aata hi jata hai 'bahzad'

wahi jis ko bhula raha hun main