lab pe hai fariyaad ashkon ki rawani ho chuki

lab pe hai fariyād ashkoñ kī ravānī ho chukī

ik kahānī chhiḌ rahī hai ik kahānī ho chukī

mehar ke parde meñ puurī dil-sitānī ho chukī

banda-parvar rahm kījiye mehrbānī ho chukī

merā dil taakā gayā jaur-o-jafā ke vāste

jab ki puure rañg par un kī javānī ho chukī

jā.iye bhī kyuuñ mujhe jhūTī tashaffī dījiye

aap se aur mere dil kī tarjumānī ho chukī

aa gayā ai sunñe vaale ab mujhe pās-e-vafā

ab bayāñ rūdād-e-dil merī zabānī ho chukī

āḳhirī aañsū mirī chashm-e-alam se gir chukā

sunñe vaalo ḳhatm ab merī kahānī ho chukī

ham bhī tañg aa hī ga.e āḳhir niyāz-o-nāz se

haañ ḳhushā-qismat ki un kī mehrbānī ho chukī

sunñe vaale sūrat-e-tasvīr baiThe haiñ tamām

hazrat-e-'bahzād' bas jādū-bayānī ho chukī

lab pe hai fariyaad ashkon ki rawani ho chuki

ek kahani chhiD rahi hai ek kahani ho chuki

mehar ke parde mein puri dil-sitani ho chuki

banda-parwar rahm kijiye mehrbani ho chuki

mera dil taka gaya jaur-o-jafa ke waste

jab ki pure rang par un ki jawani ho chuki

jaiye bhi kyun mujhe jhuTi tashaffi dijiye

aap se aur mere dil ki tarjumani ho chuki

aa gaya ai sunne wale ab mujhe pas-e-wafa

ab bayan rudad-e-dil meri zabani ho chuki

aaKHiri aansu meri chashm-e-alam se gir chuka

sunne walo KHatm ab meri kahani ho chuki

hum bhi tang aa hi gae aaKHir niyaz-o-naz se

han KHusha-qismat ki un ki mehrbani ho chuki

sunne wale surat-e-taswir baiThe hain tamam

hazrat-e-'bahzad' bas jadu-bayani ho chuki