koi ba-sad ghurur-o-naz jalwa-numa hua to kya

koī ba-sad ġhurūr-o-nāz jalva-numā huā to kyā

chashm-e-murād-mañd ko mil gayā mudda.ā to kiyā

mere niyāz-e-shauq kī mere gudāz-e-'ishq kī

kuchh nahīñ ibtidā to kyā kuchh nahīñ intihā to kyā

merā fasāna-e-alam 'arz se be-niyāz hai

maiñ ne nahīñ kahā to kyā tū ne nahīñ sunā to kyā

sāqī-e-gul-’ezār kī mast nigāh-e-yād hai

be-piye ham to mast haiñ aa gayā mai-kada to kyā

merī nigāh-e-'ishq kī taab na lā sakā koī

haaye hujūm-e-bekasī ye bhī jo ho gayā to kyā

rah-rau-o-rāh-e-’shauq ko rāh-ravī se kaam hai

bhuul gayā to kyā huā mil gayā rāsta to kyā

larza-kunāñ hai kā.ināt ġham hai hayāt aur mamāt

apnā hī jab pata nahīñ terā pata milā to kyā

kufr bhī tum ho diiñ bhī tum 'arsh bhī tum zamīñ bhī tum

tum ne hī jab bhulā diyā bhuul gayā ḳhudā to kyā

merī murād kuchh nahīñ bhūlā huuñ yaad kuchh nahīñ

merī murād-e-qalb ko tum ne samajh liyā to kyā

koi ba-sad ghurur-o-naz jalwa-numa hua to kya

chashm-e-murad-mand ko mil gaya muddaa to kiya

mere niyaz-e-shauq ki mere gudaz-e-'ishq ki

kuchh nahin ibtida to kya kuchh nahin intiha to kya

mera fasana-e-alam 'arz se be-niyaz hai

main ne nahin kaha to kya tu ne nahin suna to kya

saqi-e-gul-’ezar ki mast nigah-e-yaad hai

be-piye hum to mast hain aa gaya mai-kada to kya

meri nigah-e-'ishq ki tab na la saka koi

haye hujum-e-bekasi ye bhi jo ho gaya to kya

rah-rau-o-rah-e-’shauq ko rah-rawi se kaam hai

bhul gaya to kya hua mil gaya rasta to kya

larza-kunan hai kainat gham hai hayat aur mamat

apna hi jab pata nahin tera pata mila to kya

kufr bhi tum ho din bhi tum 'arsh bhi tum zamin bhi tum

tum ne hi jab bhula diya bhul gaya KHuda to kya

meri murad kuchh nahin bhula hun yaad kuchh nahin

meri murad-e-qalb ko tum ne samajh liya to kya