یار سے چھوٹے زمانہ ہو گیا

یار سے چھوٹے زمانہ ہو گیا

اب تو ہر عالم فسانہ ہو گیا

ہم سکوں کے نام سے واقف نہیں

مدتیں گذریں زمانہ ہو گیا

لفظ اف لب پر میری نالہ رہا

لب پہ بلبل کے ترانہ ہو گیا

اب نہیں سینے میں کوئی داغِ عشق

گل میرا فانوس خانہ ہو گیا

آفریں اے شدت درد جگر

ان سے ملنے کا بہانہ ہو گیا

کیا اسے کہتے ہیں اعجاز بیاں

لفظ جو نکلا فسانہ ہو گیا

ہے یہی بہزادؔ معراجِ حیات

ایک بیگانہ یگانہ ہو گیا