nai manzilen nae raste nae ham-safar ki talash hai

na.ī manzileñ na.e rāste na.e ham-safar kī talāsh hai

kabhī rāhzan kabhī rāh-rau kabhī rāhbar kī talāsh hai

jahāñ haal merā zubūñ huā jahāñ qalb-e-zār kā ḳhuuñ huā

jahāñ kārvān-e-sukūñ luTā usī rahguzar kī talāsh hai

na to dard-e-ġham na to be-ḳhudī na to chashm-e-tar na to bebasī

merā chāra-gar hī nahīñ koī mujhe chāra-gar kī talāsh hai

yahāñ kaun sāhib-e-hosh hai jise hosh hai vo ḳhamosh hai

tujhe kyuuñ haqīqat-e-zindagī kisī dīda-var kī talāsh hai

vo jo vajh-e-kashf-o-kushūd hai vo jo shān-e-rabb-e-vujūd hai

vo jo tere ruḳh kī numūd hai mujhe us sahr kī talāsh hai

vo ho sūd-mand ki pur-ziyāñ merā aur sar ye jhuke kahāñ

tirā sañg-e-dar tirā āstāñ merī 'umr bhar kī talāsh hai

ye jo phir rahā huuñ maiñ kū-ba-kū nahīñ hai sukūn kī justujū

usī sañg-e-dar kī hai aarzū usī sañg-e-dar kī talāsh hai

nai manzilen nae raste nae ham-safar ki talash hai

kabhi rahzan kabhi rah-rau kabhi rahbar ki talash hai

jahan haal mera zubun hua jahan qalb-e-zar ka KHun hua

jahan karwan-e-sukun luTa usi rahguzar ki talash hai

na to dard-e-gham na to be-KHudi na to chashm-e-tar na to bebasi

mera chaara-gar hi nahin koi mujhe chaara-gar ki talash hai

yahan kaun sahib-e-hosh hai jise hosh hai wo KHamosh hai

tujhe kyun haqiqat-e-zindagi kisi dida-war ki talash hai

wo jo wajh-e-kashf-o-kushud hai wo jo shan-e-rabb-e-wujud hai

wo jo tere ruKH ki numud hai mujhe us sahr ki talash hai

wo ho sud-mand ki pur-ziyan mera aur sar ye jhuke kahan

tera sang-e-dar tera aastan meri 'umr bhar ki talash hai

ye jo phir raha hun main ku-ba-ku nahin hai sukun ki justuju

usi sang-e-dar ki hai aarzu usi sang-e-dar ki talash hai