نئی منزلیں نئے راستے نئے ہمسفر کی تلاش ہے

نئی منزلیں نئے راستے نئے ہمسفر کی تلاش ہے

کبھی راہزن کبھی راہ رو کبھی راہبر کی تلاش ہے

جہاں حال میرا زبوں ہوا، جہاں قلب زار کا خوں ہوا

جہاں کاروانِ سکوں لٹا اسی رہ گذر کی تلاش ہے

نہ تو دردِ غم، نہ تو بیخودی، نہ تو چشم تر، نہ تو بے بسی

میرا چارہ گر ہی نہیں کوئی مجھے چارہ گر کی تلاش ہے

یہاں کون صاحب ہوش ہے جسے ہوش ہے وہ خموش ہے

تجھے کیوں حقیقت زندگی کسی دیدہ ور کی تلاش ہے

وہ جو وجہ کشف و کشود ہے، وہ جو شان رب ودود ہے

وہ جو تیرے رخ کی نمود ہے مجھے اس سحر کی تلاش ہے

وہ ہو سود مند کہ پر زیاں، میرا اور سر یہ جھکے کہاں

ترا سنگ در ترا آستاں میری عمر بھر کی تلاش ہے

یہ جو پھر رہا ہوں میں کوبکو، نہیں ہے سکون کی جستجو

اسی سنگِ در کی ہے، آرزو اسی سنگ در کی تلاش ہے