نہیں ملنا نہیں ملنا ہمیں منزل کبھی اپنی

نہیں ملنا نہیں ملنا ہمیں منزل کبھی اپنی

کہ منزل کی طلب رکھتی نہیں ہے رہروی اپنی

ہمارے قلب کا یہ اضطراب شوق کیوں جائے

وہی حالت جو پہلے تھی وہی ہے آج بھی اپنی

ہمیں کیا تھا ارے اے نا خدائے کشتی الفت

تجھی پر حرف آ جاتا جو کشتی ڈوبتی اپنی

تیرے روئے منور کا نہیں ہے فیض تو کیا ہے

وگرنہ چاند لایا ہے کہاں سے چاندنی اپنی

خدا رکھے وفورِ شوق کو اللہ رے عالم

کہ ہے اب بے قیام آستاں ہر بندگی اپنی

نہ اب اپنی خبر ہم کو نہ اب دل کی خبر ہم کو

ترے عالم میں گم ہونے لگی ہے زندگی اپنی

ملے معراج ہستی کی ہمیں بہزادِؔ افسردہ

ادا گر نقش پائے دوست پر ہو بندگی اپنی