ان نگاہوں کو ادھر آنے تو دو

ان نگاہوں کو ادھر آنے تو دو

کچھ پیام تازہ تر آنے تو دو

لوگ آئیں گے تو چپ لگ جائے گی

کہہ نہ پاؤں گا مگر آنے تو دو

اے میری آہو! لبوں تک ہی رہو

آ رہا ہے بے خبر آنے تو دو

ڈبڈباتے کیوں ہو چشم شوق میں

آنسوؤ وہ رخ نظر آنے تو دو

دم بدم سجدے کروں گا کیف میں

رہبرو وہ سنگ در آنے تو دو

خود چلے آئیں گے دل تھامے ہوئے

آہ میں رنگِ اثر آنے تو دو

دیکھنا بہزادؔ پھر لطف و کرم

یار کے قدموں پہ سر آنے تو دو