آشنا بن کر کوئی نا آشنا ہونے لگا

آشنا بن کر کوئی نا آشنا ہونے لگا

اس طرح پورا مقدر کا لکھا ہونے لگا

میر مستی نے الٹ دی کیوں بساط میکدہ

اے میرے ساقی یہ میخانے میں کیا ہونے لگا

ایک وہ جلوہ جو نظروں میں بسا اور رہ گیا

ایک وہ جلوہ جو نظروں سے جدا ہونے لگا

بڑھتے بڑھتے آستان یار تک پہنچی جبیں

گھٹتے گھٹتے پھر سجودِ نقش پا ہونے لگا

ایک وہ دن تھا کہ پنہاں تھا جمال روئے دوست

ایک یہ دن ہے کہ نظروں سے گلہ ہونے لگا

آخرش رہتا کہاں تک شامِ عشرت کا فریب

صبح کا تارا حقیقت آشنا ہونے لگا

پھر نگاہِ ناز اے بہزادؔ اٹھی میری طرف

پھر نگاہِ شوق کو کچھ حوصلہ ہونے لگا