us ka hi zikr har dam uski hi guftugu hai

us kā hī zikr har dam us kī hī guftugū hai

gum ho ke rah gayā huuñ ye lutf-e-justujū hai

us jā pe kaam kiyā hai ālām-e-zindagī kā

jis jā pe maiñ hī maiñ huuñ jis jā pe tū hī tū hai

un bulbuloñ ko dekho un kā fareb dekho

phūloñ kā hai bahāna kāñToñ kī aarzū hai

us kī ḳhabar ḳhabar hai us kā jigar jigar hai

us kī nazar nazar hai jis kī nazar meñ tū hai

hai be-niyāz-e-mastī maanā ki zarf merā

ai be-ḳhudī tū aajā saaqī kī aarzū hai

merī namāz-e-ulfat kā Dhañg hai nirālā

ik sajda terī jānib har sajda qibla-rū hai

'bahzād' haal merā kyā riñd pūchhte haiñ

maiñ to huuñ us kā mai-kash jis kī nazar subū hai

us ka hi zikr har dam us ki hi guftugu hai

gum ho ke rah gaya hun ye lutf-e-justuju hai

us ja pe kaam kiya hai aalam-e-zindagi ka

jis ja pe main hi main hun jis ja pe tu hi tu hai

un bulbulon ko dekho un ka fareb dekho

phulon ka hai bahana kanTon ki aarzu hai

us ki KHabar KHabar hai us ka jigar jigar hai

us ki nazar nazar hai jis ki nazar mein tu hai

hai be-niyaz-e-masti mana ki zarf mera

ai be-KHudi tu aaja saqi ki aarzu hai

meri namaz-e-ulfat ka Dhang hai nirala

ek sajda teri jaanib har sajda qibla-ru hai

'bahzad' haal mera kya rind puchhte hain

main to hun us ka mai-kash jis ki nazar subu hai