اس کا ہی ذکر ہر دم اس کی ہی گفتگو ہے

اس کا ہی ذکر ہر دم اس کی ہی گفتگو ہے

گم ہو کے رہ گیا ہوں یہ لطف جستجو ہے

اس جا پہ کام کیا ہے آلام زندگی کا

جس جا پہ میں ہی میں ہوں جس جا پہ تو ہی تو ہے

ان بلبلوں کو دیکھو ان کا فریب دیکھو

پھولوں کا ہے بہانہ کانٹوں کی آرزو ہے

اس کی خبر خبر ہے اس کا جگر جگر ہے

اس کی نظر نظر ہے جس کی نظر میں تو ہے

ہے بے نیاز مستی مانا کہ ظرف میرا

اے بے خودی تو آجا ساقی کی آرزو ہے

میری نماز الفت کا ڈھنگ ہے نرالا

اک سجدہ تیری جانب ہر سجدہ قبلہ رو ہے

بہزادؔ حال میرا کیا رند پوچھتے ہیں

میں تو ہوں اس کا میکش جس کی نظر سبو ہے