توصل ہے نہ فرقت ہے جہاں تم ہو جہاں میں ہوں

توصل ہے نہ فرقت ہے جہاں تم ہو جہاں میں ہوں

محبت ہی محبت ہے جہاں تم ہو جہاں میں ہوں

بھلا سمجھے گی کیا دنیا نیاز و ناز کا عالم

عبادت ہی عبادت ہے جہاں تم ہو جہاں میں ہوں

فضا خاموش ہے ساکت ہوا ہے ہو کا عالم ہے

فغاں بھی اک مصیبت ہے جہاں تم ہو جہاں میں ہوں

بہت مشکل ہے سودا جنسِ بازار محبت کا

محبت دل کی قیمت ہے جہاں تم ہو جہاں میں ہوں

لطافت بار ہے اس جا، نزاکت ہے گراں اس جا

وہاں اک دم غنیمت ہے، جہاں تم ہو جہاں میں ہوں

وہاں اک بیخودی کا دور ہے اور دور بھی کامل

مسرت ہے نہ کلفت ہے جہاں تم ہو جہاں میں ہوں

نہ وصل و ہجر کے جھگڑے نہ ذوق و شوق کا عالم

کسے کس کی ضرورت ہے جہاں تم ہو جہاں میں ہوں