ghaTa phir sar mai-kada aa ke chhai

ghaTā phir sar mai-kada aa ke chhā.ī

duhā.ī duhā.ī duhā.ī duhā.ī

ġhamoñ se jo ghabrā ke khīñchī duhā.ī

chaman muskurāyā kalī muskurā.ī

mubārak rahe mujh ko har dam taḌapnā

salāmat raho tum nazar kyuuñ firā.ī

kisī din to sun lo hamārā fasāna

ye achchhī nahīñ roz kī kaj-adā.ī

vahī merā 'ālam vahī terā 'ālam

vahī haiñ fazā.eñ vahī hai ḳhudā.ī

ḳhayālāt uljhe qadam Dagmagā.e

kahīñ rāste meñ jo manzil na aa.ī

zamāne se begāna dil ho rahā hai

ye kis but ne luuTī ḳhudā kī ḳhudā.ī

ye kaun aa gayā ham pe bedād karne

ye kis ne hamārī vafā āzmā.ī

taḌapnā hai 'bahzād' qismat meñ likkhā

mohabbat ne luuTī sukūñ kī ḳhudā.ī

ghaTa phir sar mai-kada aa ke chhai

duhai duhai duhai duhai

ghamon se jo ghabra ke khinchi duhai

chaman muskuraya kali muskurai

mubarak rahe mujh ko har dam taDapna

salamat raho tum nazar kyun firai

kisi din to sun lo hamara fasana

ye achchhi nahin roz ki kaj-adai

wahi mera 'alam wahi tera 'alam

wahi hain fazaen wahi hai KHudai

KHayalat uljhe qadam Dagmagae

kahin raste mein jo manzil na aai

zamane se begana dil ho raha hai

ye kis but ne luTi KHuda ki KHudai

ye kaun aa gaya hum pe bedad karne

ye kis ne hamari wafa aazmai

taDapna hai 'bahzad' qismat mein likkha

mohabbat ne luTi sukun ki KHudai