گھٹا پھر سرِ میکدہ آ کے چھائی

گھٹا پھر سرِ میکدہ آ کے چھائی

دہائی دہائی، دہائی دہائی

غموں سے جو گھبرا کے کھینچی دہائی

چمن مسکرایا کلی مسکرائی

مبارک رہے مجھ کو ہر دم تڑپنا

سلامت رہو تم نظر کیوں پھرائی

کسی دن تو سن لو ہمارا فسانہ

یہ اچھی نہیں روز کی کج ادائی

وہی میرا عالم وہی تیرا عالم

وہی ہیں فضائیں وہی ہے خدائی

خیالات الجھے، قدم ڈگمگائے

کہیں راستے میں جو منزل نہ آئی

زمانے سے بیگانہ دل ہو رہا ہے

یہ کس بت نے لوٹی خدا کی خدائی

یہ کون آگیا ہم پہ بیداد کرنے

یہ کس نے ہماری وفا آزمائی

تڑپنا ہے بہزادؔ قسمت میں لکھا

محبت نے لوٹی سکوں کی خدائی