پا کے مدہوش تمنا مجھے دیکھا نہ کریں

پا کے مدہوش تمنا مجھے دیکھا نہ کریں

میری نظریں میرے عالم کا تماشا نہ کریں

ہم نے الفت ہی کے ماروں کا یہ دیکھا انداز

دل نہ جھکتا ہو تو کعبے کو بھی سجدہ نہ کریں

مجھ کو رہبر سے کوئی کام نہ رہزن سے غرض

رہروی کا مری یہ لوگ تماشا نہ کریں

ہم کو غم کیا ملا کونین کی دولت پائی

اب کوئی ہم کو خوشی دے تو گوارا نہ کریں

میری رگ رگ کا یہ عالم ہے کہ جیسے دل ہو

آپ دیکھیں پر اس انداز سے دیکھا نہ کریں

چشم نازک سے بہاتے ہیں وہ کیوں اشک الم

ان سے کہہ دو کہ حقیقت کو نہ افسانہ کریں

راز کی بات زمانے کو بتا دو بہزادؔ

جو تمناؤ میں گم ہیں وہ تمنا نہ کریں