baiThe biThae haye ye kya ho gaya mujhe

baiThe biThā.e haaye ye kyā ho gayā mujhe

apnā nahīñ hai hosh na un kā pata mujhe

ab kis tarh milegā bhalā rāsta mujhe

manzil pe lā ke bhuul gayā rahnumā mujhe

ilzām de rahā hai ye jazb-e-vafā mujhe

karnā na chāhiye thā tumhārā gilā mujhe

duniyā-o-dīñ kā hosh na apnā pata mujhe

saaqī ne bhar ke jaam meñ kyā de diyā mujhe

kā'be kī aarzū meñ jhukī thī jabīn-e-shauq

dene lagā fareb tirā naqsh-e-pā mujhe

hone lagī jo qalb ko tūfāñ kī aarzū

sāhil kī samt le ke chalā nā-ḳhudā mujhe

'ālam na kyuuñ nisār ho mere nasīb par

qismat se mil gayā hai ġham-e-lā-davā mujhe

ġham meñ haiñ laakh lutf alam meñ hazār kaif

kyuuñ kar kahūñ ke bhuul gayā hai ḳhudā mujhe

mujh ko ye fikr hai ki ye 'ālam na duur ho

duniyā ko fikr hai ki ye kyā ho gayā mujhe

mushkil na thiiñ firāq kī ghaḌiyāñ guzārnā

aksar tire ḳhayāl ne ghabrā diyā mujhe

duniyā se kuchh alag hai merī rah-ravī kā rañg

miltā hai har qadam pe tumhārā pata mujhe

'bahzād' kyā kare merī ḳhuddārī-e-hayāt

majbūr kar rahā hai lab-e-mudda’ā mujhe

baiThe biThae haye ye kya ho gaya mujhe

apna nahin hai hosh na un ka pata mujhe

ab kis tarh milega bhala rasta mujhe

manzil pe la ke bhul gaya rahnuma mujhe

ilzam de raha hai ye jazb-e-wafa mujhe

karna na chahiye tha tumhaara gila mujhe

duniya-o-din ka hosh na apna pata mujhe

saqi ne bhar ke jam mein kya de diya mujhe

ka'be ki aarzu mein jhuki thi jabin-e-shauq

dene laga fareb tera naqsh-e-pa mujhe

hone lagi jo qalb ko tufan ki aarzu

sahil ki samt le ke chala na-KHuda mujhe

'alam na kyun nisar ho mere nasib par

qismat se mil gaya hai gham-e-la-dawa mujhe

gham mein hain lakh lutf alam mein hazar kaif

kyun kar kahun ke bhul gaya hai KHuda mujhe

mujh ko ye fikr hai ki ye 'alam na dur ho

duniya ko fikr hai ki ye kya ho gaya mujhe

mushkil na thin firaq ki ghaDiyan guzarna

aksar tere KHayal ne ghabra diya mujhe

duniya se kuchh alag hai meri rah-rawi ka rang

milta hai har qadam pe tumhaara pata mujhe

'bahzad' kya kare meri KHuddari-e-hayat

majbur kar raha hai lab-e-mudda’a mujhe