tere pas tak na pahuncha wo koi bhi chaal chal kar

tire paas tak na pahuñchā vo koī bhī chaal chal kar

jo chalā bahak-bahak kar jo chalā sañbhal-sañbhal kar

jahāñ ashk-e-nā-murādī sar-e-chashm-e-shauq aayā

mire ġham ko daad de dī mirī hasratoñ ne jal kar

mirī ek be-ḳhudī meñ haiñ hazār hosh pinhāñ

tire paas aa rahā huuñ ruḳh-e-zindagī badal kar

liyā dast-e-bāġhbāñ ne nayā imtihāñ chaman kā

kabhī ye kalī masal kar kabhī vo kalī masal kar

ye hai kufr yā ki īmāñ ye hai jahl yā ki 'irfān

terī zaat aa ga.ī hai mirī bandagī meñ Dhal kar

na to kaam aa.e rahbar na to rāste na manzar

vahīñ maiñ ne khaa.ī Thokar maiñ jahāñ chalā sambhal kar

na to vasl meñ huuñ raqsāñ na firāq meñ huuñ giryāñ

mujhe kyā banā diyā hai mirī zindagī badal kar

isī aarzū meñ barsoñ kabhī maiñ ne din guzāre

kabhī mil ga.ī hai manzil mujhe ik qadam hī chal kar

jise hijr kī talab ne sadā nā-murād rakkhā

mire lab pe aa rahī hai vo du'ā machal-machal kar

tirā ġham rahe salāmat shab-e-hijr kaaT lī hai

kabhī āh-e-sard bhar kar kabhī karvaTeñ badal kar

are josh nā-murādī are jazb nā-ummīdī

tujhe kyā milegā zālim merī hasrateñ kuchal kar

tere pas tak na pahuncha wo koi bhi chaal chal kar

jo chala bahak-bahak kar jo chala sanbhal-sanbhal kar

jahan ashk-e-na-muradi sar-e-chashm-e-shauq aaya

mere gham ko dad de di meri hasraton ne jal kar

meri ek be-KHudi mein hain hazar hosh pinhan

tere pas aa raha hun ruKH-e-zindagi badal kar

liya dast-e-baghban ne naya imtihan chaman ka

kabhi ye kali masal kar kabhi wo kali masal kar

ye hai kufr ya ki iman ye hai jahl ya ki 'irfan

teri zat aa gai hai meri bandagi mein Dhal kar

na to kaam aae rahbar na to raste na manzar

wahin main ne khai Thokar main jahan chala sambhal kar

na to wasl mein hun raqsan na firaq mein hun giryan

mujhe kya bana diya hai meri zindagi badal kar

isi aarzu mein barson kabhi main ne din guzare

kabhi mil gai hai manzil mujhe ek qadam hi chal kar

jise hijr ki talab ne sada na-murad rakkha

mere lab pe aa rahi hai wo du'a machal-machal kar

tera gham rahe salamat shab-e-hijr kaT li hai

kabhi aah-e-sard bhar kar kabhi karwaTen badal kar

are josh na-muradi are jazb na-ummidi

tujhe kya milega zalim meri hasraten kuchal kar