کیا خبر تھی تیرا ملنا بھی قیامت ڈھائے گا

کیا خبر تھی تیرا ملنا بھی قیامت ڈھائے گا

روح کی بے چینیوں کو اور بھی تڑپائے گا

گونج اٹھے گی چار سو میری نوائے عاشقی

زندگی کے ساز میں ہر نغمہ خود کھو جائے گا

پھر وہی میخانہ ہوگا پھر وہی مینائے تند

میرے لب تک پھر وہی پیمانہ کھینچ کر آئے گا

پھر میرے پائے طلب کو اور ہوگی جستجو

یعنی منزل پا کے منزل کا گماں کھو جائے گا

پھر جبین شوقِ ہوگی اور سنگِ آستاں

پھر نیازِ بندگی طوفان بن کر چھائے گا

پھر مری آنکھوں میں مچلیں گے وہی اشک الم

جس کو پا کر میرا دامن گلستاں بن جائے گا

کیا خبر تھی ساتھ چھوڑے گا نہ اے بہزادؔ عشق

زندگی کا غم مجھے تا زندگی تڑپائے گا