kya KHabar thi tera milna bhi qayamat Dhaega

kyā ḳhabar thī terā milnā bhī qayāmat Dhā.egā

ruuh kī bechainiyoñ ko aur bhī taḌpā.egā

guuñj uThegī chaar sū merī navā-e-’āshiqī

zindagī ke saaz meñ har naġhma ḳhud kho jā.egā

phir vahī mai-ḳhāna hogā phir vahī mīnā-e-tund

mere lab tak phir vahī paimāna khiñch kar aa.egā

phir mere pā-e-talab ko aur hogī justujū

yā'nī manzil pā ke manzil kā gumāñ kho jā.egā

phir jabīn-e-shauq hogī aur sañg-e-āstāñ

phir niyāz-e-bandagī tūfān ban kar chhā.egā

phir mirī āñkhoñ meñ machleñge vahī ashk-e-alam

jis ko pā kar merā dāman gulistāñ ban jā.egā

kyā ḳhabar thī saath chhoḌegā na ai 'bahzād' 'ishq

zindagī kā ġham mujhe tā-zindagī taḌpā.egā

kya KHabar thi tera milna bhi qayamat Dhaega

ruh ki bechainiyon ko aur bhi taDpaega

gunj uThegi chaar su meri nawa-e-’ashiqi

zindagi ke saz mein har naghma KHud kho jaega

phir wahi mai-KHana hoga phir wahi mina-e-tund

mere lab tak phir wahi paimana khinch kar aaega

phir mere pa-e-talab ko aur hogi justuju

ya'ni manzil pa ke manzil ka guman kho jaega

phir jabin-e-shauq hogi aur sang-e-astan

phir niyaz-e-bandagi tufan ban kar chhaega

phir meri aankhon mein machlenge wahi ashk-e-alam

jis ko pa kar mera daman gulistan ban jaega

kya KHabar thi sath chhoDega na ai 'bahzad' 'ishq

zindagi ka gham mujhe ta-zindagi taDpaega