gham-e-ashiqi dil ko pyara bahut hai

ġham-e-'āshiqī dil ko pyārā bahut hai

usī ġham kā mujh ko sahārā bahut hai

are shauq-e-dīd apnī had se na baḌh to

faqat ik jhalak ik nazārā bahut hai

jo chāhe to ye dīn-o-duniyā banā de

mohabbat kā adnā ishārā bahut hai

batāo to saaqī se kyuuñ jaam māñgeñ

hameñ to ye 'ālam hamārā bahut hai

maiñ kyuuñ jā.ūñ sair-e-bahār-e-chaman ko

tirī añkhḌiyoñ kā nazārā bahut hai

hamārā hai kyā mauj-e-tūfāñ hai ham haiñ

vo achchhe haiñ jin ko kinārā bahut hai

ḳhabar bhī hai parda-nashīñ husn terā

hai pinhāñ to kam āshkārā bahut hai

uThā.egī sarāb merī bandagī kyā

haqīqat meñ ehsāñ tumhārā bahut hai

Duboyā thā jis mauj ne mujh ko 'bahzād'

usī mauj ne phir ubhārā bahut hai

gham-e-'ashiqi dil ko pyara bahut hai

usi gham ka mujh ko sahaara bahut hai

are shauq-e-did apni had se na baDh to

faqat ek jhalak ek nazara bahut hai

jo chahe to ye din-o-duniya bana de

mohabbat ka adna ishaara bahut hai

batao to saqi se kyun jam mangen

hamein to ye 'alam hamara bahut hai

main kyun jaun sair-e-bahaar-e-chaman ko

teri ankhDiyon ka nazara bahut hai

hamara hai kya mauj-e-tufan hai hum hain

wo achchhe hain jin ko kinara bahut hai

KHabar bhi hai parda-nashin husn tera

hai pinhan to kam aashkara bahut hai

uThaegi sarab meri bandagi kya

haqiqat mein ehsan tumhaara bahut hai

Duboya tha jis mauj ne mujh ko 'bahzad'

usi mauj ne phir ubhaara bahut hai