غم عاشقی دل کو پیارا بہت ہے

غم عاشقی دل کو پیارا بہت ہے

اسی غم کا مجھ کو سہارا بہت ہے

ارے شوق دید اپنی حد سے نہ بڑھ تو

فقط اک جھلک اک نظارا بہت ہے

جو چاہے تو یہ دین و دنیا بنا دے

محبت کا ادنیٰ اشارا بہت ہے

بتاؤ تو ساقی سے کیوں جام مانگیں

ہمیں تو یہ عالم ہمارا بہت ہے

میں کیوں جاؤں سیرِ بہارِ چمن کو

تری انکھڑیوں کا نظارا بہت ہے

ہمارا ہے کیا موج طوفاں ہے ہم ہیں

وہ اچھے ہیں جن کو کنارا بہت ہے

خبر بھی ہے پردہ نشیں حسن تیرا

ہے پنہاں تو کم آشکارا بہت ہے

اٹھائے گی سراب میری بندگی کیا

حقیقت میں احساں تمہارا بہت ہے

ڈبویا تھا جس موج نے مجھ کو بہزادؔ

اسی موج نے پھر ابھارا بہت ہے