banda hua hun jab se main piran-e-pir ka

banda huā huuñ jab se maiñ pīrān-e-pīr kā

maḳhfī khulā hai bhed javānān-e-pīr kā

ummī huuñ mere haal pe hai fazl piir kā

kartā huuñ maiñ muqābla har-dam dabīr kā

achchhe se ḳhush bure se ḳhafā hai ye nafs-e-bad

dekhe koī to hāl-e-zār is sharīr kā

dekhā nazar uThā ke jo sayyād tū ne aaj

naḳhchīr ban gayā mirā dil tere tiir kā

duniyā kī fikr hai na ḳhayālāt-e-dīñ mujhe

hai dil pe iḳhtiyār jo rabb-e-qādīr kā

nāseh kī baat kā nahīñ hotā asar zarā

nasha chaḌā huā hai mujhe ḳhuub piir kā

tū paas thā to hijr thā ab duur hai to vasl

sab se alag hai rañg tire is asiir kā

ham apne rāhbar ko na kyuuñ maan jā.eñge

kholā hai us ne bhed sirāj-e-munīr kā

duniyā ke log kyuuñ na kaheñge 'amīn-e-dīn'

vāris banā huuñ maiñ bhī kisī ik faqīr kā

banda hua hun jab se main piran-e-pir ka

maKHfi khula hai bhed jawanan-e-pir ka

ummi hun mere haal pe hai fazl pir ka

karta hun main muqabla har-dam dabir ka

achchhe se KHush bure se KHafa hai ye nafs-e-bad

dekhe koi to haal-e-zar is sharir ka

dekha nazar uTha ke jo sayyaad tu ne aaj

naKHchir ban gaya mera dil tere tir ka

duniya ki fikr hai na KHayalat-e-din mujhe

hai dil pe iKHtiyar jo rabb-e-qadir ka

naseh ki baat ka nahin hota asar zara

nasha chaDa hua hai mujhe KHub pir ka

tu pas tha to hijr tha ab dur hai to wasl

sab se alag hai rang tere is asir ka

hum apne rahbar ko na kyun man jaenge

khola hai us ne bhed siraj-e-munir ka

duniya ke log kyun na kahenge 'amin-e-din'

waris bana hun main bhi kisi ek faqir ka